Турција отвора ново поглавје во енергетиката, порача Ердоган

Турција отвора ново поглавје во енергетиката, порача Ердоган

Турција отвора ново поглавје во својата енергетска историја со испраќањето на пловечка платформа за производство на природен гас во Црното Море, изјави во саботата во своето видео обраќање турскиот претседател Реџеп Тајип Ердоган. „Денеска отвораме сосема нова страница во нашата енергетска историја. Го испраќаме ‘Осман Гази’, во суштина пловечки индустриски објект, на неговата оперативна позиција во Црното Море“, рече Ердоган цитиран од агенцијата Аnadolu.

Ердоган ја опиша платформата како прв производствен објект на „Сината татковина“, поморската визија на Турција во рамките на иницијативата „Векот на Турција“. Опремена со 21 посебна единица, платформата ќе преработува природен гас извлечен од сондажите во гасното поле Сакарја и ќе го транспортира до пристаништето Филјос на брегот на Црното Море преку подводни цевководи, објасни Ердоган. „Производството на природен гас во Црното Море ќе се удвои на 20 милиони кубни метри дневно, а од 2027 година, едно од три домаќинства ќе го користи нашиот домашен природен гас“, додаде турскиот претседател.

„Нашата цел е да го запалиме пламенот на гасното поле Сакарја во факелната кула ‘Осман Гази’ пред крајот на оваа година“, рече турскиот министер за енергетика и природни ресурси Алпарслан Бајрактар ​​на церемонијата по повод заминувањето на платформата во пристаништето Филјош. Платформата, која е планирано да работи во Црното Море 20 години, има цел да го зголеми дневното производство на природен гас во полето Сакарја од 9,5 милиони на 20 милиони кубни метри. Пловечкиот објект е долг 298,5 метри, широк 56 метри и висок 29,5 метри.